An Jaddada Muhimmancin Tantance Ayyukan Ci Gaban Mazabar Tarayya ta Zariya

Jagoran Zaria Youth Peace and Development Round Table, Malam Ishaq Alhassan Kauran Mata Jnr, ya ce manufar taron masu ruwa da tsaki ita ce samar da wani dandali da zai bai wa masu ruwa da tsaki damar yin sahihin nazari kan ayyukan ci gaban da aka aiwatar a Mazabar Tarayya ta Zariya, tare da ba wa al'umma damar bayyana ra'ayoyinsu cikin gaskiya da adalci.

Kauran Mata Jnr ya bayyana hakan ne a wajen taron masu ruwa da tsaki da aka gudanar a K & R Hotel da ke Zariya, bayan mahalarta sun kai ziyarar duba manyan ayyukan ci gaba da aka aiwatar a sassan mazabar.

Ya ce ba a shirya taron domin yabon wani ko sukar wani ba, sai dai domin tabbatar da cewa ana tantance ayyukan ci gaba ne bisa hujjoji da abin da ido ya gani. Ya bayyana cewa irin wannan tsari zai taimaka wajen ƙarfafa gaskiya, riƙon amana da shugabanci nagari.

Ya ƙara da cewa matasa suna da muhimmiyar rawa wajen gina ƙasa, don haka ya zama wajibi su shiga cikin tattaunawar da ta shafi ci gaban al'ummominsu ta hanyar bayar da shawarwari masu amfani da kuma ƙarfafa haɗin kai tsakanin gwamnati da jama'a.

A cewarsa, irin waɗannan tarurruka suna ƙarfafa dimokuraɗiyya ta hanyar bai wa jama'a damar tantance ayyukan shugabanninsu tare da gabatar da shawarwari kan yadda za a inganta shirye-shiryen ci gaba domin su ƙara amfani ga al'umma.

Malam Ishaq Alhassan Kauran Mata Jnr ya gode wa mahalarta taron da suka fito daga jami'o'i, ƙungiyoyin farar hula, kafafen yaɗa labarai, shugabannin al'umma, ƙungiyoyin matasa da sauran masu ruwa da tsaki bisa gudunmawar da suka bayar cikin gaskiya da kuma kishin ci gaban Zariya.

Tun da farko, mahalarta taron sun kai ziyarar duba manyan ayyukan ci gaba da aka aiwatar a mazabar, ciki har da aikin titin kilomita 17.5 daga Global Foundation ta Madadaci da Majeru zuwa babbar hanyar Kaduna–Kano, da kuma Gadar Aba, tare da manyan asibitocin zamani da ke GwarGwaje da Zaria Education City.

Har ila yau, tawagar ta kai ziyara zuwa Zaria Education City, inda ta duba cibiyoyin ilimi da sauran gine-ginen ci gaba da ake ginawa, waɗanda suka haɗa da Kwalejin Noma ta Tarayya, Kwalejin Kiwon Dabbobi, Kwalejin Jinya, Cibiyar Bunƙasa Fasaha, Cibiyar Bunƙasa Mata, da kuma ofishin 'yan sanda na zamani.

Da yake jawabi bayan kammala zagayen duba ayyukan, tsohon Sanatan Kaduna ta Tsakiya, Sanata Suleiman Usman Hunkuyi, wanda ya jagoranci zaman tattaunawar masu ruwa da tsaki, ya yaba da yadda mahalarta suka gudanar da tantancewar cikin gaskiya, adalci da kishin ci gaban Zariya.

Sanata Hunkuyi ya ce bai wa jama'a damar duba ayyuka da idanunsu kafin su bayyana ra'ayoyinsu wata hanya ce mai inganci ta ƙarfafa gaskiya, riƙon amana da shugabanci nagari.

Ya kuma yaba wa Kakakin Majalisar Wakilai, Rt. Hon. Abbas Tajudeen, bisa dimbin ayyukan ci gaba da ya aiwatar a Mazabar Tarayya ta Zariya, yana mai cewa ayyukan sun shafi muhimman fannoni kamar ilimi, kiwon lafiya, hanyoyi da bunƙasa tattalin arziki.

Ya buƙaci al'umma su ci gaba da bai wa shugabanni shawarwari masu amfani tare da tabbatar da kula da kayayyakin more rayuwa da aka samar domin su ci gaba da amfani ga al'umma na yanzu da ta gaba.

A nasa jawabin, Shugaban Ƙaramar Hukumar Zariya, Injiniya Jamil Ahmad Muhammad, ya yaba wa masu shirya taron bisa samar da wani dandali da ke ƙarfafa tattaunawa da kuma tantance ayyukan ci gaba cikin gaskiya.

Ya tabbatar wa mahalarta cewa gwamnatin ƙaramar hukuma za ta ci gaba da haɗa kai da hukumomin da abin ya shafa domin tabbatar da cewa al'ummar Zariya suna ci gaba da cin gajiyar ayyukan raya ƙasa.

Injiniya Jamil Ahmad Muhammad ya kuma yaba wa Rt. Hon. Abbas Tajudeen bisa gagarumar gudunmawar da yake bayarwa wajen samar da manyan ayyukan more rayuwa a mazabar, yana mai cewa ayyukan za su taimaka matuƙa wajen bunƙasa ilimi, kiwon lafiya, sufuri da inganta rayuwar tattalin arzikin al'umma.

Ya gode wa mahalarta taron bisa shawarwarin da suka bayar, yana mai cewa irin waɗannan shawarwari ne ke taimakawa wajen inganta tsare-tsare da tabbatar da cewa ayyukan gwamnati suna biyan buƙatu da muradun jama'a.